സെക്കന്റ്‌ ഷോ

മമ്മൂട്ടിയുടെ മകന്‍  ദുല്‍ഖര്‍ സല്‍മാന്‍, നടന്‍ സണ്ണി വെയിന്‍, സംവിധായകന്‍ ശ്രീനാഥ് രാജേന്ദ്രന്‍, തിരക്കഥകൃത്ത് വിനി വിശ്വലാല്‍, ചായഗ്രഹകാന്‍ പപ്പു, ചിത്രസന്നിവേശകര്‍ പ്രവീണ്‍-ശ്രീകാന്ത്, സംഗീത സംവിധായകന്‍ നിഖില്‍ എന്നീ പുതുമുഖങ്ങളുടെ സിനിമയോടുള്ള അഭിന്നിവേശവും കഠിന പരിശ്രമവുമാണ് സെക്കന്റ്‌ ഷോ എന്ന മലയാള സിനിമ. പുതിയൊരു പാതയിലൂടെ സഞ്ചരിക്കാന്‍ ആരംഭിക്കുന്ന മലയാള സിനിമയിലെ ഏറ്റവും പുതിയ പരീക്ഷണമാണ് ശ്രീനാഥ് രാജേന്ദ്രനും കൂട്ടരും ഈ സിനിമയിലൂടെ പ്രേക്ഷകര്‍ക്ക്‌ മുന്നിലെത്തിക്കാന്‍ ശ്രമിച്ചത്. ക്വോട്ടേഷന്‍ സംഘങ്ങളുടെ പശ്ചാത്തലത്തില്‍ കഥപറയുന്ന നിരവധി സിനിമകള്‍ മലയാളത്തില്‍ പുറത്തിറങ്ങിയിട്ടുണ്ടെങ്കിലും സെക്കന്റ്‌ ഷോ സിനിമ അവയില്‍ നിന്നെല്ലാം വേറിട്ട്‌ നില്‍ക്കുന്നു. എ.ഓ.പി.എല്‍. എന്റര്‍ടൈന്‍മെന്റ്സ് നിര്‍മ്മിച്ച ഈ സിനിമയില്‍ കുഞ്ചന്‍, ബാബുരാജ്‌, രോഹിണി എന്നീ മുന്‍നിര താരങ്ങള്‍ ഒഴികെ മറ്റെല്ലാ കഥാപാത്രങ്ങളും അവതരിപ്പിച്ചത് പുതുമുഖങ്ങളാണ്. അതുപോലെ തന്നെ, സംഘട്ടന രംഗങ്ങള്‍ ഒരുക്കിയ മാഫിയ ശശി, പാട്ടിന്റെ വരികള്‍ എഴുതിയ കൈതപ്രം, ചന്ദ്രശേഖരന്‍, ശബ്ദലേഖനം നല്‍ക്കിയ രംഗനാഥ് രവി എന്നിവര്‍ ഒഴികെ മറ്റെല്ലാ സാങ്കേതിക വശങ്ങളും കൈകാര്യം ചെയ്തിരിക്കുന്നത് താരതമ്യേന പുതുമുഖങ്ങളാണ്. 

ലാലു എന്നറിയപെടുന്ന ഹരിലാലും കുരുടി എന്ന ഇരട്ടപേരുള്ള നെല്‍സണ്‍ മണ്‍ഡെലയും ആത്മാര്‍ത്ഥ സുഹൃത്തുക്കളാണ്. ഇരുവരും ചെറിയ ക്വോട്ടേഷന്‍ ജോലികളും കഞ്ചാവ് കടത്തലുമായി ജീവിക്കുന്നത്തിനിടയിലാണ് വാവച്ചന്‍ എന്ന ഗുണ്ട നേതാവിനെ പരിച്ചയപെടുന്നത്. വാവച്ചന്റെ നിര്‍ദേശ പ്രകാരം ലാലുവും കുരുടിയും വാവച്ചനും ചേര്‍ന്ന് വിഷ്ണു ബുദ്ധന്‍ എന്ന അധോലോക നേതാവിന്റെ അനുയായിയെ ആളുമാറി ആക്രമിക്കുന്നത്. ഈ സംഭവത്തിനു പകരം വീട്ടലായി വിഷ്ണു ബുദ്ധനും കൂട്ടരും വവച്ചനെ വകവരുത്തുന്നു. തുടര്‍ന്ന് ലാലുവും കുരുടിയും കൂട്ടരും വിഷ്ണു ബുദ്ധന്റെ ആളുകളെ തിരിച്ചു ആക്രമിക്കുന്നു. ലാലുവിന്റെ ധൈര്യവും പ്രവര്‍ത്തിയും ഇഷ്ടപെടുന്ന വിഷ്ണു ബുദ്ധന്‍ ലാലുവിനെ അയാളുടെ സംഗത്തില്‍ ചേര്‍ക്കുന്നു. ഒരു പ്രത്യേക സാഹചര്യത്തില്‍ ലാലുവും വിഷ്ണു ബുദ്ധനും തമ്മില്‍ ശത്രുതയിലാകുന്നു. പിന്നീട് ലാലുവിന്റെ ജീവിതത്തില്‍ ഉണ്ടാകുന്ന സംഭവങ്ങളാണ് സെക്കന്റ്‌ ഷോ എന്ന സിനിമയുടെ കഥ. ലാലുവായി ദുല്‍ക്കര്‍ സല്‍മാനും, കുരുടിയായി സണ്ണി വെയിനും വിഷ്ണു ബുദ്ധനായി സുദ്ദേഷ് ബെറിയുമാണ് അഭിനയിച്ചിരിക്കുന്നത്. 


കഥ, തിരക്കഥ: എബവ് ആവറേജ്
പുതുമുഖം വിനി വിശ്വലാല്‍ ആദ്യമായി രചന നിര്‍വഹിക്കുന്ന സെക്കന്റ്‌ ഷോ സിനിമ പുതുമകള്‍ കൊണ്ട് സമ്പന്നമാണ്. ഒരുപാട് ഭാഷകളിലുള്ള സിനിമകളില്‍ കണ്ടിട്ടുള്ള ക്വോട്ടേഷന്‍ സംഘങ്ങളുടെ കഥയാണ് ഈ സിനിമയുടെതെങ്കിലും തിരക്കഥയിലെ പുതുമകളും മികച്ച സംഭാഷണങ്ങളും സെക്കന്റ്‌ ഷോ സിനിമയെ വ്യെതസ്തമാക്കുന്നു. അതുപോലെ ഓരോ കഥാപത്രങ്ങളുടെ സൃഷ്ട്ടിയും അവരുടെ സംഭാഷണങ്ങളും പ്രേക്ഷകര്‍ ഇന്നുവരെ കേട്ടിട്ടില്ലാത്ത രീതിയിലാണ് എന്നതാണ് ഈ സിനിമയുടെ രചനയിലുള്ള പ്രത്യേകത. ഈ പ്രത്യേകതകളൊക്കെ ഉണ്ടെങ്കിലും സിനിമയുടെ കഥയിലുള്ള പഴമയും, രണ്ടാം പകുതിയിലെ ചില രംഗങ്ങളും, നടീനടന്മാരുടെ അഭിനയത്തിലെ കുഴപ്പങ്ങളും സിനിമയെ ദോഷകരമായി ബാധിച്ചിരിക്കുന്നു.

സംവിധാനം: ഗുഡ്
സെക്കന്റ്‌ ഷോ സിനിമ പ്രേക്ഷകര്‍ സ്വീകരിചെങ്കില്‍, ആ വിജയത്തിന്റെ പ്രധാന കാരണം ശ്രീനാഥ് രാജേന്ദ്രന്‍ എന്ന സംവിധായകന്റെ സംവിധാന മികവു തന്നെ. കണ്ടുമടുത്ത കഥയാണെങ്കിലും പുതിയ രീതിയില്‍ ഈ സിനിമയെ സമീപിച്ചതാണ് ഈ വിജയത്തിന് കാരണം. കഥാപാത്ര രൂപികരണവും, കഥാസന്ദര്‍ഭങ്ങളിലുള്ള പുതുമയും പ്രേക്ഷകരെ രസിപ്പിക്കുന്ന സംഭാഷണങ്ങളും സെക്കന്റ്‌ ഷോ സിനിമയെ വ്യതസ്തമാക്കുന്നു. ക്യാമറയുടെ മുന്നിലും പിന്നിലും നിരവധി പുതുമുഖങ്ങള്‍ അണിനിരക്കുന്ന ഈ സിനിമ ശരാശരി നിലവാരത്തിനു മുകളില്‍ എത്തിക്കാന്‍ ശ്രീനാഥിന് സാധിച്ചുവെങ്കില്‍, പുതുമുഖ സംവിധായകന്‍ എന്ന നിലയില്‍ വലിയൊരു കാര്യമാണ് അദ്ദേഹം കൈവരിച്ചിരിക്കുന്നത്. വയലന്‍സ്-ആക്ഷന്‍ ഗണത്തില്‍ പെടുന്ന സിനിമയായത് കൊണ്ടാവാണം സംവിധായകന്‍ പരമാവധി റിയലസ്റ്റിക്ക് ആയി രംഗങ്ങള്‍ ചിത്രീകരിച്ചത്. അതുകൊണ്ട് തന്നെ, ചില രംഗങ്ങളില്‍ അഭിനേത്തകളുടെ മുഖം അവ്യക്ത്തമായി അനുഭവപെട്ടു. ഇനിയും നല്ല സിനിമകള്‍ സംഭാവന ചെയ്യുവാന്‍ ശ്രീനാഥിനും കൂട്ടര്‍ക്കും സാധിക്കട്ടെ.  

സാങ്കേതികം: എബവ് ആവറേജ്
ഒട്ടേറെ പുതുമുഖങ്ങള്‍ സാങ്കേതിക വശങ്ങള്‍ കൈകാര്യം ചെയ്യുന്ന സെക്കന്റ്‌ ഷോ സിനിമയുടെ ചായാഗ്രഹണം നിര്‍വഹിച്ചത് പപ്പുവാണ്. സിനിമയിലെ ചില രംഗങ്ങളില്‍ അഭിനേത്തകളുടെ മുഖം കാണാന്‍ പറ്റാത്തതും, സംഘട്ടന രംഗങ്ങളില്‍ ക്യാമറ അങ്ങോട്ടും ഇങ്ങോട്ടും ആവശ്യമില്ലത്തെ ഓടിച്ചും രംഗങ്ങള്‍ ബോറക്കുവാന്‍ പപ്പുവിന് സാധിച്ചു. ഈ കുറവുകളൊക്കെ പരിഹരിച്ചത് പ്രവീണ്‍-ശ്രീകാന്ത് എന്നിവരുടെ ചിത്രസന്നിവേശനമാണ്. റെക്സ് വിജയന്‍ ഒരുക്കിയ പശ്ചാത്തല സംഗീതവും സിനിമയ്ക്ക് ഗുണം ചെയ്തിട്ടുണ്ട്. നവാഗതനായ നിഖില്‍ രാജനും "ആനകള്ളന്‍" പാട്ടിനു സംഗീതം നല്‍ക്കിയ അവിയല്‍ ബാന്റുമാണ് ഈ സിനിമയുടെ സംഗീത സംവിധായകര്‍. മാഫിയ ശശിയുടെ സംഘട്ടന രംഗങ്ങളും പുതുമയുള്ളതായിരുന്നു. 

അഭിനയം: ആവറേജ്
മമ്മൂട്ടിയുടെ മകന്‍  ദുല്‍ഖര്‍ സല്‍മാന്‍ നായകനായ ഈ സിനിമയില്‍ മോശമല്ലാത്ത അഭിനയം കാഴ്ചവെച്ചു കൊണ്ട് അഭിനയ രംഗത്തേക്ക് കടന്നുവന്നിരിക്കുകയാണ് താരപുത്രന്‍. സെക്കന്റ്‌ ഷോ സിനിമയില്‍ ഏറ്റവും മികച്ച പ്രകടനം കാഴ്ച്ചവെചിരിക്കുന്നത് സണ്ണി വെയിന്‍ എന്ന പുതുമുഖമാണ്. ഇവരെ കൂടാതെ സുദേഷ് ബെറി, കുഞ്ചന്‍, ബാബുരാജ്‌, മുരളികൃഷ്ണന്‍, രോഹിണി, ഗൌതമി നായര്‍ എന്നിവരും കുറെ പുതുമുഖങ്ങളും അഭിനയിച്ചിരിക്കുന്നു.
 

സിനിമയുടെ പ്ലസ്‌ പോയിന്റ്സ്:
1 ശ്രീനാഥ് രാജേന്ദ്രന്റെ സംവിധാനം
2 കഥാപാത്രങ്ങളുടെ അവതരണവും സംഭാഷണങ്ങളും
3 സണ്ണി വെയിന്‍ എന്ന പുതുമുഖ നടന്റെ അഭിനയം
4 ബോറടിപ്പിക്കാതെ വേഗതയോടെ പറഞ്ഞുപോകുന്ന കഥാരീതി
5 ചിത്രസന്നിവേശം

സിനിമയുടെ മൈനസ് പോയിന്റ്സ്
1 പുതുമയില്ലാത്ത കഥ
2 അഭിനയം

സെക്കന്റ്‌ ഷോ റിവ്യൂ: വയലന്‍സ്-ആക്ഷന്‍ ഗണത്തില്‍പെടുന്ന സിനിമകളില്‍ നിന്നും വേറിട്ട്‌ നില്‍ക്കുന്നു എന്നതിലുപരി, പാശ്ചാത്യ സിനിമകളില്‍ മാത്രം കണ്ടിട്ടുള്ള സംവിധാന രീതിയും കഥാപാത്രങ്ങളുടെ അവതരണവും ആദ്യമായി പരീക്ഷിക്കപെട്ട മലയാള സിനിമ  എന്ന രീതിയില്‍ സെക്കന്റ്‌ ഷോ ഇന്നത്തെ യുവതലമുറയെ ത്രിപ്തിപെടുത്തും എന്നുറപ്പ്.

സെക്കന്റ്‌ ഷോ റേറ്റിംഗ്: 6.20 / 10
കഥ, തിരക്കഥ: 6 / 10 [എബവ് ആവറേജ്]
സംവിധാനം: 7 / 10 [ഗുഡ്]
സാങ്കേതികം: 3 / 5 [എബവ് ആവറേജ്]
അഭിനയം: 2.5 / 5 [ആവറേജ്]
ആകെ മൊത്തം: 18.5 / 30 [6.2 / 10]

സംവിധാനം: ശ്രീനാഥ് രാജേന്ദ്രന്‍
നിര്‍മ്മാണം: എ.ഓ.പി.എല്‍. എന്റര്‍ടെയിന്‍മെന്റ്സ്
കഥ, തിരക്കഥ, സംഭാഷണം: വിനി വിശ്വലാല്‍
ചായാഗ്രഹണം: പപ്പു
ചിത്രസന്നിവേശം: പ്രവീണ്‍ എല്‍, ശ്രീകാന്ത് എന്‍.ബി
വരികള്‍: കൈതപ്രം, ഏങ്ങണ്ടിയൂര്‍ ചന്ദ്രശേഖരന്‍, സുധി വെണമണ്ണൂര്‍
സംഗീതം: നിഖില്‍ രാജന്‍, അവിയല്‍ ബാന്‍ഡ്
പശ്ചാത്തല സംഗീതം: റെക്സ് വിജയന്‍
സംഘട്ടനം: മാഫിയ ശശി