പ്രണയിക്കുന്നവര്‍ക്കായി കഥകള്‍ എഴുതി പുസ്തകമാക്കി വില്‍ക്കുക എന്നതായിരുന്നു വിനയചന്ദ്രന്റെ തൊഴില്‍. അങ്ങനെയിരിക്കെ, ഒരു പ്രത്യേക സാഹചര്യത്തില്‍ കോളേജ് കാന്റീനിലെ ജോലി വിനയചന്ദ്രന് സ്വീകരിക്കേണ്ടി വരുന്നു. കോളേജില്‍ എത്തുന്ന വിനയചന്ദ്രന്, പ്രേമിക്കുവാന്‍ ആഗ്രഹിക്കുന്നവരെ ഒന്നിപ്പിക്കുന്ന ദൌത്യം ഏറ്റെടുക്കുന്നു. വിനയചന്ദ്രന്റെ സുഹൃത്തുക്കളായ വെങ്കിടി [മണികുട്ടന്‍], സുധി[ഭഗത് മാനുവല്‍], റോയ്[ഹേമന്ത് മേനോന്‍], എന്നിവരെയെല്ലാം പ്രേമിപ്പിക്കുവാനായി വിനയചന്ദ്രന് നടത്തുന്ന ശ്രമങ്ങള്‍ വിജയകരമാകുന്നു. അതോടെ, ആ കോളേജില്‍ വിനയചന്ദ്രന് ഡോക്ടര്‍ ലൗ എന്ന പേരില്‍ അറിയപെട്ടു തുടങ്ങുന്നു. കോളേജിലെ ഒട്ടുമിക്ക ആണ്‍കുട്ടികളുടെയും സ്വപ്നമായ എബിനിനെ [ഭാവന] പ്രേമിക്കുവാനായി, റോയ് വിനയചന്ദ്രന്റെ സഹായം തേടുന്നു. ഇതു മനസ്സിലാക്കുന്ന എബിന്‍, റോയിയുടെ പ്രണയ അഭ്യര്‍ഥന നിരസിക്കുകയും, വിനയചന്ദ്രനെ തോല്പിക്കുവാന്‍ വേണ്ടി എബിന്‍ സ്നേഹിക്കുന്നത് വിനയചന്ദ്രനെ ആണെന്ന് എല്ലാ കുട്ടികളുടെയും മുമ്പില്‍ വെച്ച് പറയുന്നോതോടെ വിനയചന്ദ്രന് കൂടുതല്‍ കുഴപ്പിത്തിലാകുന്നു. എബിനെ കൊണ്ട് റോയിയെ പ്രേമിപ്പിക്കും എന്ന വെല്ലുവെളി ഏറ്റെടുക്കുന്ന വിനയചന്ദ്രന്റെ ജീവിതത്തിലുണ്ടാകുന്ന സംഭവങ്ങളാണ് ഈ സിനിമയുടെ കഥ.
കഥ - തിരക്കഥ: ബിലോ ആവറേജ്
എക്കാലവും നല്ല കെട്ടുറപ്പുള്ള കഥകള്‍ ഇരുകൈയ്യും നീട്ടി സ്വീകരിച്ചു വിജയമാക്കിയിട്ടുള്ള മലയാളി സിനിമ പ്രേക്ഷകര്‍ക്ക്‌ മുമ്പില്‍, ഒരു ലോജിക് ഇല്ലാത്ത കഥയുമായി സിനിമയെടുക്കാന്‍ കാണിച്ച കെ.ബിജുവിന്റെ ധൈര്യം അപാരം തന്നെ. ഈ സിനിമയിലെ കോളേജില്‍ ക്യാമ്പസ്‌ കാണുമ്പോള്‍ കുട്ടികള്‍ പടിക്കുവാനാണോ കോളേജില്‍ വരുന്നത്, അതോ പ്രേമിക്കുവാനാണോ എന്ന് തോന്നിപ്പോകും. രസകരമായ കഥയാണെങ്കിലും, അത് വിശ്വസനീയമായ തിരക്കഥയിലൂടെയും, കഥാസന്ദര്ഭങ്ങളിലൂടെയും സംവിധായകന്‍ പറയാന്‍ ശ്രമിച്ചിലെങ്കില്‍, പാഴായിപോയ ശ്രമമായെ പ്രേക്ഷകര്‍ വിലയിരുത്തുകയുള്ളൂ. കെ. ബിജു ഒരുക്കിയ കഥയും, തിരക്കഥയും തികച്ചും അവിശ്വസനീയമായി അനുഭവപെട്ടു. ബോറടിപ്പിക്കാത്ത രംഗങ്ങള്‍ ആണെങ്കിലും, സിനിമ അവസാനിക്കുമ്പോള്‍, ഇങ്ങനെയൊക്കെ സംഭവിക്കുമോ എന്ന് പ്രേക്ഷകര്‍ക്ക്‌ തോന്നുന്നത്തില്‍ തെറ്റില്ല.
സംവിധാനം: ആവറേജ്
ഒരുപാട് പ്രമുഖ സംവിധായകരുടെ സഹ സംവിധായകനായി പ്രവര്‍ത്തിച്ച ബിജു അരൂക്കുറ്റിയാണ് കെ. ബിജു എന്ന പേരില്‍ ഈ സിനിമ സംവിധാനം ചെയ്തിരിക്കുന്നത്. സിനിമയോടുള്ള സമീപനവും, സംവിധാന രീതിയും കണ്ടാല്‍ ഒരു നവാഗതനാനെന്ന തോന്നുകയേയില്ല. വിശ്വസനീയമായ കഥയല്ലെങ്കിലും, ബോറടിപ്പിക്കാത്ത രീതിയില്‍ കളര്‍ഫുള്‍ വിഷ്വല്സും, നല്ല പാട്ടുകളും, കോളേജ് ക്യാമ്പസ്‌ പ്രണയവുമെല്ലാം നല്ലരീതിയില്‍ സമന്വയിപ്പിച്ച് ചിത്രീകരിച്ചതു കൊണ്ട്, ഈ സിനിമ കണ്ടിരിക്കാവുന്ന ഒന്നായിമാറി. ഇതു, ബിജു എന്ന സംവിധായകന്റെ കഴിവ് തന്നെയാണ്. കുറെ അനാവശ്യ കഥാപാത്രങ്ങളും, സിനിമയുടെ രണ്ടര മണിക്കൂര്‍ ദൈര്‍ഗ്യവും ഒഴിവാക്കിയിരുന്നു എങ്കില്‍ ഈ സിനിമ കുറെക്കൂടെ മികച്ചതാക്കാമായിരുന്നു.
സാങ്കേതികം: ഗുഡ്
ഈ സിനിമയില്‍ ഏറ്റവും മികച്ചു നില്‍ക്കുന്നത് ഷാജി ഒരുക്കിയ വിഷ്വല്‍സ് തന്നെയാണ്. സിനിമയുടെ തുടക്കം മുതല്‍ അവസാനം വരെ ഓരോ രംഗങ്ങളും കളര്‍ഫുള്ളായി ചിത്രീകരിച്ചത് കൊണ്ട് രണ്ടര മണിക്കൂര്‍ നീളമുള്ള ഈ സിനിമയില്‍ ബോറടിപ്പിക്കുന്ന തരത്തിലുള്ള ഒരു രംഗം പോലും ഇല്ലതായായത് സിനിമയ്ക്ക് ഗുണം ചെയ്തിട്ടുണ്ട്. ചായഗ്രഹകനോടൊപ്പം പ്രശംസ അര്‍ഹിക്കുന്ന മറ്റൊരു വ്യെക്തിയാണ് ഈ സിനിമയ്ക്ക് വേണ്ടി പശ്ചാത്തല സംഗീതം ഒരുക്കിയ ഗോപി സുന്ദര്‍. ഓരോ രംഗങ്ങള്‍ക്കും അനിയോജ്യമായ പശ്ചാത്തല സംഗീതം ഒരുക്കാന്‍ ഗോപി സുന്ദറിനു സാധിച്ചു. അതുപോലെ തന്നെ, വിനു തോമസ്‌ ഒരുക്കിയ പാട്ടുകള്‍ കേള്‍ക്കാന്‍ ഇമ്പമുള്ളതായിരിന്നു. കാര്‍ത്തിക് ആലപിച്ച "ഓര്‍മ്മകള്‍ വേരോടും..." എന്ന പാട്ടും, പുതുമുഖം റിയാ രാജു പാടിയ "നിന്നോട് എനിക്കുള്ള പ്രണയം..." എന്ന പാട്ടും അതിമനോഹരമായി ചിട്ടപെടുത്തിയിരിക്കുന്നു.
അഭിനയം: എബവ് ആവറേജ്
സീനിയേഴ്സ് എന്ന മെഗാ ഹിറ്റ് സിനിമയ്ക്ക് ശേഷം കുഞ്ചാക്കോ ബോബനെ ക്യാമ്പസ്‌ പ്രണയകഥയിലെ നായകനാക്കിയ സിനിമയാണ് ഡോക്ടര്‍ ലൗ. മിതമായ വികാരപ്രകടനങ്ങളും, അതില്‍ കുഞ്ചാക്കോ ബോബന്‍ കാട്ടിയ സ്വഭാവീകതയും, വിനയചന്ദ്രന് എന്ന കഥാപാത്രം അഭിനയിക്കാന്‍ അനിയോജ്യനായ നടന്‍ താന്‍ തന്നെ എന്ന് പ്രേക്ഷകര്‍ക്ക്‌ തോന്നിപ്പിക്കും വിധം കുഞ്ചാക്കോ ബോബന്‍ മനോഹരമാക്കി. താരതമ്യെനേ പുതുമുഖങ്ങളാണെങ്കിലും മണികുട്ടനും, ഭഗത് മാനുവലും, രെജിത് മേനോനും, അജു വര്‍ഗീസും അവരവരുടെ കഥപാത്രങ്ങള്‍ നന്നായിത്തന്നെ അവതരിപ്പിച്ചു. ഒരു ക്യാമ്പസ്‌ സിനിമയായത് കൊണ്ട് വലിയ ഒരു താരനിര തന്നെ ഈ സിനിമയില്‍ അഭിനയിച്ചിട്ടുണ്ട്. കുഞ്ചാക്കോ ബോബന്‍, ഭഗത് മാനുവല്‍, മണികുട്ടന്‍, ഇന്നസെന്റ്, രെജിത് മേനോന്‍, ഹേമന്ത് മേനോന്‍, അജു വര്‍ഗീസ്, ശ്രാവന്‍, നെടുമുടി വേണു, കലാഭവന്‍ ഷാജോണ്‍, വിജയരാഘവന്‍, സലിം കുമാര്‍, കലാഭവന്‍ ഹനീഫ്, മജീദ്‌, ബിയോണ്‍, ബൈജു എഴുപുന്ന, ഭാവന, അനന്യ, വിദ്യ ഉണ്ണി, കെ.പി.എ.സി.ലളിത, ശാരി, ബിന്ദു പണിക്കര്‍, നിമിഷ, റോസ്‌ലിന്‍ എന്നിവരാണ് ഈ സിനിമയിലെ അഭിനേതാക്കള്‍. ഇവരെ കൂടാതെ, ലാലും, ആസിഫ് അലിയും ഈ സിനിമയിലെ കഥയുടെ ആമുഖം പറയുവാനായി ആദ്യ രംഗങ്ങളില്‍ അഭിനയിച്ചിട്ടുണ്ട്..
സിനിമയുടെ പ്ലസ്‌ പോയിന്റ്സ്:
1. കളര്‍ഫുള്‍ വിഷ്വല്‍സ്
2. ബോറടിപ്പിക്കാത്ത രംഗങ്ങള്‍
3. ചായാഗ്രഹണം, പശ്ചാത്തല സംഗീതം
4. പാട്ടുകള്‍
സിനിമയുടെ മൈനസ് പോയിന്റ്സ്:
1. കഥ, തിരക്കഥ
2. കഥയില്‍ പ്രാധാന്യമില്ലാത്ത കുറെ കഥാപാത്രങ്ങള്‍
ഡോക്ടര്‍ ലൗ റിവ്യൂ: ലോജിക് കുറവുള്ള കഥകള്‍ കാണുവാന്‍ കുഴപ്പമില്ലാത്ത പ്രേക്ഷകര്‍ക്കും, കോളേജില്‍ നടക്കുന്ന സ്ഥിരം തമാശകളും, പാരവെപ്പുകളും, കണ്‍ഫ്യുഷനുകളും, അടിപിടിയുമെല്ലാം കോര്‍ത്തിണക്കിയ കുറെ സന്ദര്ഭങ്ങളുള്ള സിനിമകള്‍ ഇഷ്ടപെടുന്ന പ്രേക്ഷകര്‍ക്കും വേണ്ടിയുള്ള സിനിമയാണ് ഡോക്ടര്‍ ലൗ.
ഡോക്ടര്‍ ലൗ റേറ്റിംഗ്: 4.80 / 10
കഥ-തിരക്കഥ: 3 / 10 [ബിലോ ആവറേജ്]
സംവിധാനം: 5 / 10 [ആവറേജ്]
സാങ്കേതികം: 3.5 / 5 [ഗുഡ്]
അഭിനയം: 3 / 5 [എബവ് ആവറേജ്]
ആകെ മൊത്തം: 14.5 / 30 [4.8 / 10 ]
രചന, സംവിധാനം: കെ.ബിജു
നിര്‍മ്മാണം: ജോയ് തോമസ്‌ ശക്തികുളങ്ങര
ബാനര്‍: ജിതിന്‍ ആര്‍ട്സ്
ചായാഗ്രഹണം: ഷാജി
ചിത്രസന്നിവേശം: വി. സാജന്‍
വരികള്‍: വയലാര്‍ ശരത്ചന്ദ്ര വര്‍മ്മ
സംഗീതം: വിനു തോമസ്‌
പശ്ചാത്തല സംഗീതം: ഗോപി സുന്ദര്‍
വിതരണം: ആശിര്‍വാദ് മാക്സ് ലാബ്
