30 Apr 2012

22 ഫീമെയില്‍ കോട്ടയം

അന്യഭാഷാ സിനിമകള്‍ക്ക്‌ മുമ്പില്‍ മലയാള സിനിമയുടെ യശസ്സ് ഉയര്‍ത്തിയ സിനിമകളായ ആദാമിന്റെ മകന്‍ അബു, ട്രാഫിക്‌ എന്നീ സിനിമകള്‍ക്ക്‌ ശേഷം, മറ്റൊരു ശക്തമായ പ്രമേയം 22 ഫീമെയില്‍ കോട്ടയം എന്ന മലയാള സിനിമയിലൂടെ രാജ്യാന്തര തലത്തില്‍ ശ്രദ്ധ നേടുവാന്‍ പോകുന്നു. കുറെ വര്‍ഷങ്ങളായി സ്ത്രീകള്‍ക്കെതിരെ നടന്നുവരുന്ന ക്രൂരതകളോട്, സ്ത്രീകള്‍ തന്നെ പ്രതികരിച്ചാല്‍ എന്ത് സംഭവിക്കും എന്നതാണ് 22 ഫീമെയില്‍ കോട്ടയം എന്ന സിനിമയിലൂടെ ചര്ച്ചചെയ്യപെടുന്ന പ്രധാന വിഷയം. ബംഗാലൂരു പോലുള്ള വന്‍കിട നഗരങ്ങളില്‍ യഥാര്‍ഥത്തില്‍ സംഭവിച്ചു കൊണ്ടിരിക്കുന്ന വിഷയമാണ് ആഷിക് അബുവും ശ്യാം പുഷ്കരനും അഭിലാഷ് കുമാറും ഈ സിനിമയ്ക്ക് കഥയായി തിരഞ്ഞെടുത്തിരിക്കുന്നത്. ആ വിഷയത്തോടും കഥയോടും നീതിപുലര്‍ത്തുന്ന രീതിയില്‍ വിശ്വസനീയമായ കഥാസന്ദര്‍ഭങ്ങളിലൂടെ വികസിക്കുന്ന സിനിമയാണ് 22 ഫീമെയില്‍ കോട്ടയം. ഇത്രയും ശക്തമായ ഒരു പ്രമേയം സിനിമയക്കുവാന്‍ തീരുമാനിച്ച കഥാക്രുത്തുക്കള്‍ക്കും, സംവിധായകനും, നിര്‍മ്മാതാവിനും അഭിനന്ദനങ്ങള്‍!

കോട്ടയം ജില്ലയില്‍ ജനിച്ചു വളര്‍ന്ന, ഇപ്പോള്‍ ബംഗാലൂരില്‍ നേഴ്സായി ജോലി ചെയുന്ന, 22 വയസ്സ് പ്രായമുള്ള ടെസ്സ കെ. എബ്രഹാമാണ് ഈ സിനിമയിലെ നായിക. കാനഡയില്‍ നേഴ്സിംഗ് ജോലി ലഭിക്കുവാനായി ശ്രമിക്കുന്ന ടെസ്സ, വിസ എജന്റ് സിറില്‍ മാത്യുവിനെ പരിച്ചയപെടുന്നു. ആ ബന്ധം വളര്‍ന്നു സൌഹൃദത്തിലും, തുടര്‍ന്ന് അവര്‍ തമ്മില്‍ പ്രണയത്തിലുമാകുന്നു. അങ്ങനെയിരിക്കെ, ടെസ്സയുടെ ജീവിതത്തില്‍ അവിചാരിതമായി കുറെ സംഭവങ്ങളുണ്ടാകുന്നു. ആ ദുരന്തങ്ങളെല്ലാം സഹിച്ചു, അവള്‍ അവളെ ദ്രോഹിച്ചവര്‍ക്കെതിരെ നടത്തുന്ന പ്രതികാരമാണ് ഈ സിനിമയുടെ കഥ. ടെസ്സയായി റീമ കല്ലിങ്ങലും, സിറില്‍ മാത്യുവായി ഫഹദ് ഫാസിലും അഭിനയിച്ചിരിക്കുന്നു.

കഥ, തിരക്കഥ: ഗുഡ്
സോള്‍ട്ട് ആന്‍ഡ്‌ പെപ്പര്‍ എന്ന സിനിമയുടെ തിരക്കഥ രചയ്താക്കളില്‍ ഒരാളായ ശ്യാം പുഷ്കരനും, സിനിമ നടി ലെനയുടെ ഭര്‍ത്താവ് അഭിലാഷ് കുമാറും ചേര്‍ന്നാണ് 22 ഫീമെയില്‍ കോട്ടയം സിനിമയുടെ കഥയും തിരക്കഥയും സംഭാഷണങ്ങളും എഴുതിയത്. ഇന്ത്യയിലെ പ്രമുഖ നഗരങ്ങളില്‍ ഇന്നും സംഭവിച്ചുകൊണ്ടിരിക്കുന്ന ഒരു യഥാര്‍ത്ഥ വിഷയം, സിനിമയ്ക്കവശ്യമുള്ള എല്ലാ ഘടഗങ്ങളും ചേര്‍ത്ത് അവതരിപ്പിച്ചത് കൊണ്ട്, എല്ലാതരം പ്രേക്ഷകര്‍ക്കും കണ്ടിരിക്കുവാനും മനസിലാക്കുവാനും, അതിലുപരി സിനിമയിലൂടെ നല്‍കുന്ന സന്ദേശം ഉള്‍കൊള്ളുവാനും സാധിച്ചു. സമൂഹത്തില്‍ സ്ത്രീകള്‍ക്കെതിരെ നടന്നുവരുന്ന ക്രൂരതകള്‍ക്കെതിരെ അവര്‍ തന്നെ പ്രതികരിക്കണം എന്നതാണ് ടെസ്സയുടെ ജീവിതത്തിലൂടെ തിരക്കഥ രചയ്താക്കളും സംവിധായകനും പ്രേക്ഷകര്‍ക്ക്‌ നല്‍ക്കുന്ന സന്ദേശം. ഈ സിനിമയില്‍ ടെസ്സ പ്രതികാരത്തിനായി സ്വീകരിക്കുന്ന വഴികള്‍ തന്നെ സ്വീകരിക്കണം എന്ന അര്‍ത്ഥമില്ല. സിനിമ എന്ന രീതിയില്‍ ഒരല്പം അതിശയോക്തി ടെസ്സയുടെ പ്രതികാര രീതിയില്‍ ഉണ്ടെങ്കിലും, ആ രംഗങ്ങളെല്ലാം വിശ്വസനീയമായി പ്രേക്ഷകര്‍ക്ക്‌ അനുഭവപെട്ടു എന്നിടത്താണ് തിരക്കഥകൃത്തുകള്‍ വിജയിച്ചത്.
 


സംവിധാനം: വെരി ഗുഡ്
സംവിധായകന്റെ കലയാണ്‌ സിനിമ എന്ന വിശേഷണം അര്‍ത്ഥമാകുന്ന രീതിയിലാണ് ആഷിക് അബു 22 ഫീമെയില്‍ കോട്ടയം സംവിധാനം ചെയ്തിരിക്കുന്നത്. ആദ്യ സിനിമയില്‍ നിന്നും സോള്‍ട്ട് ആന്‍ഡ്‌ പെപ്പറില്‍ എത്തിയപ്പോള്‍ സംവിധായകന്‍ എന്ന നിലയില്‍ ഒരുപാട് വളര്‍ന്നിരുന്ന ആഷിക് അബു, താന്‍ മലയാള സിനിമയുടെ അഭിവാജ്യ ഘടകമായ സംവിധായകരില്‍ ഒരാളാണ് എന്ന് ഈ സിനിമയിലൂടെ തെളിയിച്ചിരിക്കുകയാണ്. സമാന്തര സിനിമയില്‍ കാണുന്നത് പോലെ, സാധാരണ പ്രേക്ഷര്‍ക്കൊന്നും മനസിലാക്കാതെ രംഗങ്ങളിലൂടെ കഥ പറഞ്ഞിരുന്നുവെങ്കില്‍, അംഗീകാരങ്ങള്‍ ലഭിക്കുവാന്‍ സാധ്യത കൂടുമായിരുന്നു. അംഗീകാരങ്ങള്‍ ലക്ഷ്യമാക്കാതെ, എല്ലാ സിനിമകളും ഇഷ്ടപെടുന്ന പ്രേക്ഷകര്‍ക്ക്‌ മനസിലാകും വിധത്തില്‍ ഈ സിനിമയെ സമീപിച്ച ആഷിക് അബുവിന് നന്ദി! അതുപോലെ തന്നെ, നായികയെ ഒരു തെറ്റും ചെയ്യാത്ത പതിവ്രതയായി ചിത്രീകരിക്കാതെ, എല്ലാ മനുഷ്യരെയും പോലെ ഒരല്പം തെറ്റുകുറ്റങ്ങളും കുറവുകളും ഒക്കെയുള്ള ഒരു സാധാരണ പെണ്ണായി ചിത്രീകരിച്ചതും വിശ്വസനീയമായി അനുഭവപെട്ടു. ഇതെല്ലാം സംവിധായകന്റെ കഴിവ് തന്നെ എന്നതില്‍ യാതൊരു സംശയവുമില്ല. മികവുറ്റ സാങ്കേതിക പ്രവര്‍ത്തകരെ ഈ സിനിമയില്‍ ഉപയോഗിച്ചതും സിനിമയ്ക്ക് ഏറെ ഗുണം ചെയ്തിട്ടുണ്ട്. ആഷിക് അബുവിന്റെ അടുത്ത സിനിമ സംരംഭമായ 'ഇടുക്കി ഗോള്‍ഡ്‌' നായി
എല്ലാ സിനിമ പ്രേമികളെയും പോലെ നിരൂപണവും കാത്തിരിക്കുന്നു. 
 
സാങ്കേതികം: വെരി ഗുഡ്
ട്രാഫിക്‌, സോള്‍ട്ട് ആന്‍ഡ്‌ പെപ്പര്‍ എന്നീ സിനിമകളിലൂടെ ദ്രിശ്യവിസ്മയങ്ങള്‍ പ്രേക്ഷകര്‍ക്ക്‌ നല്‍ക്കിയ ഷൈജു ഖാലിദ്‌ എന്ന ചായഗ്രാഹകന്റെ അത്യുജ്വല വിഷ്വല്‍സ് ആണ് ഈ സിനിമയില്‍ പ്രേക്ഷകര്‍ കാണുവാന്‍ സാധിക്കുന്നത്. ഒരു സിനിമയിലെ ഓരോ രംഗങ്ങളും ഓര്‍ത്തിരിക്കുവാന്‍ പ്രേക്ഷകര്‍ക്ക്‌ സാധിക്കുന്നു എങ്കില്‍, അത് ചായഗ്രഹകാന്‍ എന്ന നിലയില്‍ ഷൈജു ഖാലിദിന്റെ വിജയം തന്നെയാണ്. ഷൈജു ക്യാമറയില്‍ പകര്‍ത്തിയ വിഷ്വല്‍സ് വിവേക് ഹര്‍ഷനാണ് സന്നിവേശം ചെയ്തിരിക്കുന്നത്. അതുപോലെ തന്നെ, റെക്സ് വിജയന്‍ നല്‍ക്കിയ പശ്ചാത്തല സംഗീതം ആ രംഗങ്ങളെ മികവുറ്റതാക്കുന്നു. ഭാവയുടെ കല സംവിധാനവും, സമീറ സനീഷിന്റെ വസ്ത്രാലങ്കാരവും സിനിമയ്ക്ക് ഏറെ ഗുണം ചെയ്തിട്ടുണ്ട്. ആര്‍. വേണുഗോപാല്‍, റഫീക്ക് അഹമ്മദ്‌ എഴുതിയ വരികള്‍ക്ക് ബിജിബാലാണ് സംഗീത സംവിധാനം നല്ക്കിയിരിക്കുന്നത്. ടൈറ്റില്‍ ഗാനം ഉള്‍പ്പടെ മൂന്ന് ഗാനങ്ങളാണ് ഈ സിനിമയില്‍ ഉള്ളത്. 


അഭിനയം: വെരി ഗുഡ്
സ്ത്രീകള്‍ക്ക് പ്രാധാന്യമുള്ള കഥകള്‍ മലയാള സിനിമയില്‍ ഉണ്ടാകുക എന്നത് വളരെ വിരളമാണ്. അങ്ങനെയുള്ള സിനിമകളിലെ സ്ത്രീ കഥാപാത്രങ്ങളെല്ലാം ദുഖപുത്രികളാണ്. അതില്‍ നിന്നും വ്യതസ്തമായ കഥാപാത്രമാണ് ടെസ്സ. ടെസ്സയായി അതിമനോഹരമായ പ്രകടനമാണ് റീമ കല്ലിങ്ങല്‍ ഈ സിനിമയില്‍ കാഴ്ച്ചവെചിരിക്കുന്നത്. റീമയോടൊപ്പം തുല്യ പ്രാധാന്യമുള്ള കഥാപാത്രത്തെ അവതരിപ്പിച്ച ഫഹദ് ഫാസിലും മികച്ച അഭിനയമാണ്
കാഴ്ച്ചവെചിരിക്കുന്നത്. ഇവരെ കൂടാതെ, പ്രതാപ്‌ പോത്തനും, ടീ.ജി.രവിയും, സത്താറും, കുറെ പുതുമുഖങ്ങളും അവരവരുടെ കഥാപാത്രങ്ങളെ മികവുറ്റതാക്കി. 

   
സിനിമയുടെ പ്ലസ്‌ പോയിന്റ്സ്:
1. പ്രമേയം,കഥ
2. ആഷിക് അബുവിന്റെ സംവിധാനം
3. സംഭാഷണങ്ങള്‍
4. ചായാഗ്രഹണം, ചിത്രസന്നിവേശം, പശ്ചാത്തല സംഗീതം
5. ഫഹദ്, റീമ, പ്രതാപ് പോത്തന്‍, ടീ.ജി.രവീ എന്നിവരുടെ അഭിനയം

 
22 ഫീമെയില്‍ കോട്ടയം റിവ്യൂ: സ്ത്രീകളോട് മോശമായി പെരുമാറുന്നവര്‍ക്കെതിരെ പ്രതികരിക്കുന്ന ടെസ്സയെ പോലെയുള്ള സ്ത്രീകളാണ് നമ്മുടെ സമൂഹത്തില്‍ ഉണ്ടാകേണ്ടത് എന്ന ശക്തമായ പ്രമേയം, പൂര്‍ണ വിശ്വസനീയതയോടെ അവതരിപ്പിച്ച സംവിധായകന്‍ ആഷിക് അബുവിനും, സംവിധായകനെ സഹായിച്ച നിര്‍മ്മാതാവ് ഓ.ജി സുനിലിനും, സാങ്കേതിക വശങ്ങള്‍ കൈകാര്യം ചെയ്ത ഷൈജു ഖാലിദ്‌, വിവേക് ഹര്‍ഷന്‍, ബിജിബാല്‍, റെക്സ് വിജയന്‍, സമീറ സനീഷ് തുടങ്ങിയവര്‍ക്കും, നടീനടന്മാരായ റീമ കല്ലിങ്ങല്‍, ഫഹദ് ഫാസില്‍, പ്രതാപ് പോത്തന്‍, സത്താര്‍, ടീ.ജി.രവീ എന്നിവര്‍ക്കും ഒരായിരം അഭിനന്ദനങ്ങള്‍!  
 

22 ഫീമെയില്‍ കോട്ടയം റേറ്റിംഗ്: 7.70 / 10
കഥ,തിരക്കഥ: 7 / 10 [ഗുഡ്]
സംവിധാനം: 8 / 10 [വെരി ഗുഡ്]
സാങ്കേതികം: 4 / 5 [വെരി ഗുഡ്]
അഭിനയം: 4 / 5 [വെരി ഗുഡ്]
ടോട്ടല്‍: 23 / 30 [7.7 / 10]

 
സംവിധാനം: ആഷിക് അബു
നിര്‍മ്മാണം: ഓ.ജി.സുനില്‍
ബാനര്‍: ഫിലിം ബ്രൂവരി
കഥ,തിരക്കഥ,സംഭാഷണം: ശ്യാം പുഷ്ക്കരന്‍, അഭിലാഷ് കുമാര്‍
ചായാഗ്രഹണം: ഷൈജു ഖാലിദ്‌
ചിത്രസന്നിവേശം:വിവേക് ഹര്‍ഷന്‍
വരികള്‍: വേണുഗോപാല്‍ ആര്‍., റഫീക്ക് അഹമ്മദ്‌
സംഗീതം: ബിജിബാല്‍
പശ്ചാത്തല സംഗീതം: റെക്സ് വിജയന്‍
വസ്ത്രാലങ്കാരം: സമീറ സനീഷ്
മേയിക്കപ്: റഹീം കൊടുങ്ങല്ലൂര്‍
വിതരണം: ഷേണായിസ് സിനിമാസ്

6 comments:

  1. I heard, the back score of the first half is by bigibal and and the second half by rex vijayan! - One good thing about Ashiq Abu is, he is good in adding songs, which will actually benifit for the movie and for the promo!!!

    ReplyDelete
  2. the movie is very well directed. a good and bold attempt.

    ReplyDelete
  3. Kurach sex,Avihithabandham etc...
    ITHANO New generation malayala cinima?
    KASHTAM............

    ReplyDelete
  4. നല്ല സിനിമ എന്നല്ല , സിനിമ എന്ന് പോലും ഇതിനെ പറയാന്‍ പറ്റില്ല
    ഈ സിനിമ എന്ത് സന്ദേശമാണ് സമൂഹത്തിനു നല്‍കുന്നത് ? .
    കുടുംബ സമേതം ഇത് കാണാന്‍ പറ്റുമോ ?
    തോന്നിയത് പോലെ പബ്ബുകളിലും ബാറുകളിലും കാമുകന്റെ കിടപ്പറയിലും കയറുന്ന നായികയെ സ്ത്രീകള്‍ മാതൃകയാക്കണോ ?

    ReplyDelete
    Replies
    1. it's a very gud film. Fahad did a great job. Grand master polulla boring films irangumbol ithu vijayikkum athinu paranjittu karyamilla.

      Delete
  5. മീശ പിരിച്ചും , നെടുനീളന്‍ ഡയലോഗ് പറഞ്ഞും കയ്യടി വാങ്ങുന്ന ഇപ്പോഴുള്ള നക്ഷത്രങ്ങള്‍ക്ക് മുന്‍കാല നടന്മാരായ ടി. ജി. രവിയുടെയും , പ്രതാപ് പോത്തന്റെയും , സത്താറിന്റെയും അഭിനയം കണ്ടു പഠിക്കാവുന്നതാണ് .

    ReplyDelete